„ამერიკელი ფსიქოპათის“ რიმეიკი: ბრეტ ისტონ ელისის თქმით, ეს „სრულიად განსხვავებული ხედვა“ იქნება

2025 წელს რეჟისორ მერი ჰარონის მიერ ბრეტ ისტონ ელისის ნაწარმოების ეკრანიზაციის, საკულტო კლასიკად ქცეული „ამერიკელი ფსიქოპათის“ (ნახეთ აქ) გამოსვლიდან 25 წელი შესრულდა. სანამ ფანები იუბილეს აღნიშნავდნენ, რეჟისორი ლუკა გუადანინო, რომლის ფილმოგრაფიაშიც შედის „ჩელენჯერსი“, „დამიძახე შენი სახელით“, „ძვლები და ყველაფერი“, „ქვიარი“ და „სუსპირიას“ რიმეიკი, ემზადება „ამერიკელი ფსიქოპათის“ რიმეიკის სათავეში ჩასადგომად. გუადანინო, გავრცელებული ინფორმაციით, ფილმის რეჟისორად 2024 წლის ოქტომბერში დაინიშნა, სცენარზე კი სკოტ ზ. ბერნსმა („კონტაგიონი“) იმუშავა. იმავე წლის დეკემბერში გავიგეთ, რომ ოსტინ ბატლერი („ელვისი“) და ჯეიკობ ელორდი („სოლთბერნი“) განიხილებოდნენ პატრიკ ბეიტმენის მთავარი როლისთვის, პერსონაჟის, რომელიც ჰარონის ფილმში კრისტიან ბეილმა განასახიერა. პატრიკ შვარცენეგერი („თეთრი ლოტუსი“) ასევე „რადარზე“ იყო ფილმის პროდიუსერებისთვის... მაგრამ პროექტის შესახებ ახალი ინფორმაცია დიდი ხანია არ გვსმენია. თავად ელისის თქმით, ეს შესაძლოა იმის გამო მოხდა, რომ არავის სურს კრისტიან ბეილის კვალზე სიარული, ამიტომ სცენარი გადამუშავდა, რათა კონცეფციასთან დაკავშირებით „სრულიად განსხვავებული ხედვა“ შემოეთავაზებინა. ჰარონის „ამერიკელ ფსიქოპათს“ შემდეგი სიუჟეტი ჰქონდა: პატრიკ ბეიტმენი ახალგაზრდა, სიმპათიური, ჰარვარდის განათლების მქონე უოლ სტრიტის წარმატებული ბიზნესმენია, რომელიც თითქოს სრულყოფილია თავის განსაცვიფრებელ საცოლესთან და გავლენიან მეგობრებთან ერთად. მაგრამ მისი მეგობრების წრემ არ იცის სხვა პატრიკ ბეიტმენი, ის, ვისაც სტატუსსა და მატერიალურ ნივთებზე მეტი სურს. დეტექტივი მის კვალზეა, ცდუნება კი ყველგანაა, პატრიკ ბეიტმენი ვერ ებრძვის თავის საშინელ სურვილებს, რომლებიც მას ქალების დევნაში, სიხარბესა და უმძიმეს დანაშაულში – მკვლელობაში – უბიძგებს! ბრეტ ისტონ ელისის საკამათო წიგნზე დაფუძნებული „ამერიკელი ფსიქოპათი“ სექსუალური თრილერია, რომელიც საშინელ და შემზარავ ხედვას წარმოგვიდგენს. ჰარონმა სცენარი გუინევერ ტერნერთან ერთად დაწერა. ელისმა თავის პოდკასტზე რიმეიკის შესახებ საუბრისას თქვა (მადლობა Bloody Disgusting-ის მეგობრებს ტრანსკრიფციისთვის): „რამდენიმე მაღალი პროფილის მსახიობმა, რომელთა სახელებსაც ვერ დავასახელებ, უარი თქვა როლზე. ვფიქრობ, შესაძლოა იმიტომ, რომ მათ არ სურთ კრისტიან ბეილის ადგილზე ყოფნა.“ მან დასძინა, რომ სკოტ ზ. ბერნსმა სცენარის ახალი ვერსია წარადგინა მას შემდეგ, რაც A-კატეგორიის მსახიობებმა უარი განაცხადეს. „როგორც მეუბნებიან, ეს ფილმი სრულიად განსხვავდება მერი ჰარონის 2000 წლის ფილმისგან. ეს სრულიად განსხვავებული მიდგომაა და მას არანაირი მსგავსება არ ექნება იმ ფილმთან.“ ამ შემთხვევაში, შესაძლოა, ახლა უკეთესი შანსია, რომ მსახიობმა იპოვოს გზა, რათა პატრიკ ბეიტმენის პერსონაჟში საკუთარი კვალი დატოვოს. გიხარიათ თუ არა იმის გაგება, რომ „ამერიკელი ფსიქოპათის“ რიმეიკი კონცეფციის სრულიად განსხვავებული ვერსია იქნება? გაგვიზიარეთ თქვენი მოსაზრებები კომენტარებში.