CNN-ის ყოფილი წამყვანი დონ ლემონი ბრალდებულია ანტი-საიმიგრაციო (ICE) პროტესტში სავარაუდო მონაწილეობის გამო. ამ დაკავებამ მედიაში დიდი აჟიოტაჟი გამოიწვია. გადაცემა „The View“-ს წამყვანებმა განაცხადეს, რომ ეშინიათ, შემდეგი სამიზნე თავად არ გახდნენ. დონ ლემონი CNN-ის წამყვანი თითქმის 20 წლის განმავლობაში იყო. იგი 2023 წელს გაათავისუფლეს 17-წლიანი მუშაობის შემდეგ, სექსისტურად მიჩნეული არაერთი საკამათო კომენტარის გამო. ამის შემდეგ მან დამოუკიდებელ ჟურნალისტად განაგრძო სიახლეების გაშუქება სოციალურ მედიაში. სწორედ ამას აცხადებს ის, რომ აკეთებდა 18 იანვარს, მინესოტას შტატის ქალაქ სენტ-პოლში, ეკლესიაში გამართული პროტესტის დროს. ეკლესია ანტი-ICE აქციის მონაწილეებით გაივსო მას შემდეგ, რაც გაირკვა, რომ ეკლესიის პასტორი ICE-ის აგენტი იყო. თუმცა, ხელისუფლების განცხადებით, დონ ლემონმა დაარღვია FACE აქტი და ხელი შეუშალა მრევლს, შეუფერხებლად განეხორციელებინათ რელიგიური მსახურება. CNN-ის ყოფილი წამყვანი 30 იანვარს გენერალური პროკურორის პემ ბონდის ბრძანებით დააკავეს. იგი გირაოს გარეშე გაათავისუფლეს და ბრალდების მოსასმენად სასამართლოში 2026 წლის 9 თებერვალს უნდა გამოცხადდეს. დონ ლემონის დაკავებამ ცხარე დებატები გამოიწვია სიტყვის თავისუფლების უფლებაზე, რომელიც კონსტიტუციის პირველი შესწორებითაა (First Amendment) დაცული. პირველი შესწორება ასევე იცავს რელიგიის თავისუფლებას. „The View“-ს რამდენიმე წამყვანი, მათ შორის სანი ჰოსტინი და ანა ნავარო, დონ ლემონის ახლო მეგობრები არიან. მათ ორივემ მკაცრად გააკრიტიკა ტრამპის ადმინისტრაცია დონ ლემონის დაკავებისთვის. „ვფიქრობ, არასწორი ადამიანი აირჩიეს სამიზნედ, რადგან დონ ლემონი არ დანებდება. დონ ლემონს აქვს რესურსი, სტრუქტურა, გუნდი, გამბედაობა და ფული ამ ადმინისტრაციასთან საბრძოლველად,“ - განაცხადა ანა ნავარომ CNN-ის ყოფილი წამყვანის დაკავებასთან დაკავშირებით. სანი ჰოსტინმა ივარაუდა, რომ საქმე დაიხურებოდა. მისი თქმით, ლემონი უბრალოდ თავის საქმეს აკეთებდა. „დონი ჟურნალისტია, ის ადგილზე მომუშავე ჟურნალისტია. მას წიწაკის სპრეი და ცრემლსადენი გაზი ესროლეს. ის ამბავს აშუქებდა და ამის გზაზე არაფერი უნდა დამდგარიყო.“ ანა ნავარომ მიანიშნა, რომ დონ ლემონის დაკავება საბოლოოდ ტრამპის ადმინისტრაციის წინააღმდეგ შემობრუნდებოდა. მან მთავრობა ეპშტეინის ფაილების უახლესი გამოქვეყნებიდან ყურადღების გადატანის მცდელობაში დაადანაშაულა. გარდა ამისა, მან განაცხადა, რომ ეს იყო დაშინების ტაქტიკა. „ვფიქრობ, ეს არის შემზარავი გზავნილის გაგზავნა ყველასთვის, ვინც ფაქტებს აშუქებს. რატომღაც, ნუ, მე ვიცი მიზეზი, ამ ადმინისტრაციას ეშინია, რომ ხალხმა სიმართლე დაინახოს და ინფორმირებული იყოს,“ - თქვა რესპუბლიკელმა წამყვანმა. ვუპი გოლდბერგი დაეთანხმა ანა ნავაროს და კიდევ უფრო შორს წავიდა. მან ივარაუდა, რომ „The View“-ს წამყვანები შესაძლოა შემდეგი სამიზნეები აღმოჩნდნენ. „ხედავთ, რა ხდება. იცით, რა ხდება. თუ ეს ასე ხდება იმ ადამიანთან, რომელიც გარეთაა და აშკარად თავის საქმეს აკეთებს, თქვენი აზრით, რა დაგვემართება ჩვენ?“ „The View“-ს წამყვანები ხშირად აკრიტიკებენ პრეზიდენტ ტრამპს, რის გამოც თეთრი სახლისგან საყვედურებს იღებენ. თუმცა, ამ დროისთვის, მოქმედ ადმინისტრაციას არანაირი ნაბიჯი არ გადაუდგამს თოქ-შოუს წამყვანების სისხლის სამართლის პასუხისგებაში მისაცემად.