გარდაიცვალა „ეიფორიას“ და „გრეის ანატომიის“ ვარსკვლავი ერიკ დეინი

„ეიფორიას“ შემქმნელი სემ ლევინსონი პატივს მიაგებს ერიკ დეინს, რომელიც HBO Max-ის სერიალში კალ ჯეიკობსის როლს ასრულებდა. დეინი ხუთშაბათს გარდაიცვალა. „გულგატეხილი ვარ ჩვენი ძვირფასი მეგობრის, ერიკის დაკარგვით. მასთან მუშაობა დიდი პატივი იყო. მასთან მეგობრობა კი – საჩუქარი. ერიკის ოჯახისთვის ვლოცულობთ. დალოცვილი იყოს მისი ხსოვნა“, - განაცხადა ლევინსონმა Variety-სთვის მიცემულ განცხადებაში. დეინმა ALS-ის (ამიოტროფული გვერდითი სკლეროზი) დიაგნოზი გასულ წელს გაასაჯაროვა. HBO Max-მა Instagram-ზე დაწერა: „ღრმად ვართ დამწუხრებულნი ერიკ დეინის გარდაცვალების ამბით. ის წარმოუდგენლად ნიჭიერი იყო და HBO-ს გაუმართლა, რომ მასთან „ეიფორიას“ სამ სეზონზე იმუშავა. ამ მძიმე დროს, ჩვენი ფიქრები მის ახლობლებს ეკუთვნის.“ დეინმა Variety-ს გასულ წელს განუცხადა: „ყოველთვის ღრმა პატივისცემით ვეკიდებოდი სამსახიობო ოსტატობას, მაგრამ თავს არასდროს მივიჩნევდი ხელოვანად. ამას ვერასოდეს ვაღიარებდი, სანამ „ეიფორიაზე“ მუშაობა არ დავიწყე. სწორედ მაშინ მივეცი თავს უფლება, ხელოვანი ვყოფილიყავი.“ ლევინსონთან მუშაობის შესახებ დეინმა თქვა: „სემ ლევინსონს იმდენად ვენდობი, რომ ნამდვილად არ მჭირდება ვიცოდე, რა ხდება. გადაღების დღეს, მას შეუძლია უბრალოდ მითხრას, რა გავაკეთო და სად წავიდე, და მე ამით კმაყოფილი ვარ.“ „გრეის ანატომიაში“ „მაკსტიმის“ როლით ცნობილი დეინი „ეიფორიაში“ ჯეიკობ ელორდის პერსონაჟის რთული ხასიათის მამას თამაშობდა. წლების განმავლობაში, კალიფორნიაში დაბადებული მსახიობი ასევე გამოჩნდა სერიალებში „გიდეონის გადაკვეთა“, „მოჯადოებულები“ და „უკანასკნელი ხომალდი“, ასევე ფილმებში, მათ შორის: „მარლი და მე“, „ვალენტინობის დღე“ და „იქს-ადამიანები: უკანასკნელი ბრძოლა“. გასულ წელს, მან მონაწილეობა მიიღო Amazon Prime-ის სერიალ „ქაუნთდაუნში“ სპეციალური აგენტის როლში. დეინი ALS-ის მხარდაჭერას აქტიურად ადვოკატირებდა I Am ALS-ის საშუალებით და Washington Post-თან საუბარში განაცხადა: „ზედმეტად პირქუში რომ არ გამოვჩნდე, მაგრამ იცით, თუ მივდივარ ამქვეყნიდან, მინდა, ვინმეს დავეხმარო.“