HBO-ს მომავალი ადაპტაცია „ჰარი პოტერი“ დიდი ხნის განმავლობაში გასაიდუმლოებული იყო, ცოტა რამ იყო ცნობილი იმის შესახებ, თუ როგორ განვითარდებოდა სერიალი ან როდის გამოვიდოდა ის. თუმცა, Warner Bros. Discovery-ის ერთ-ერთმა მაღალჩინოსანმა ცოტა ხნის წინ საინტერესო ინფორმაცია გაავრცელა. სერიალი ეფუძნება ჯ.კ. როულინგის ფენტეზის ჟანრის წიგნებს, რომლებიც ასევე ადაპტირებული იქნა გლობალურ ფენომენად ქცეულ Warner Bros.-ის ფილმების სერიად 2001-დან 2011 წლამდე. ის მოგვითხრობს ობოლი ბიჭის, ჰარი პოტერის ცხოვრებაზე, რომელიც მე-11 დაბადების დღეზე აღმოაჩენს, რომ ჯადოქარია და ჰოგვარტსის მაგიისა და ჯადოქრობის სკოლაში ირიცხება. იქ ის ხვდება თავის საუკეთესო მეგობრებს, რონ უიზლისა და ჰერმიონ გრეინჯერს და აღმოაჩენს შოკისმომგვრელ სიმართლეს, რომ მისი მშობლები ბნელი ჯადოქრის, ლორდ ვოლდემორის, ხელით დაიღუპნენ. Variety-სთან ინტერვიუში, WBD-ის სტრიმინგის ხელმძღვანელმა, ჯ.ბ. პერეტმა ისაუბრა HBO-ს დიდი ხნის ნანატრი „ჰარი პოტერის“ ადაპტაციისთვის მიმდინარე ამაღელვებელ მოვლენებზე და თაყვანისმცემლებს, რომლებიც მოუთმენლად ელოდებიან, დიდ სიახლეებს დაჰპირდა. HBO-ს ჯერ არ დაუსახელებია სერიალის გამოსვლის კონკრეტული თარიღი, თუმცა მსახიობთა შემადგენლობა უკვე ცნობილია და სერიალის გადაღებებიც დაწყებულია. „პროდუქციის მასშტაბი, დეტალები, სიზუსტე, რასაც ისინი აკეთებენ და რასაც აშენებენ, კინოგადაღებებს სრულიად განსხვავებულ დონეზე აჰყავს. ასე რომ, როდესაც ამ ფრენჩაიზის სიყვარულზე ფიქრობთ და იმაზე, რისი გაკეთებაც შეგიძლიათ სერიალში — შეგიძლიათ უფრო ღრმად ჩახვიდეთ და მეტი ამბავი მოყვეთ, მოყვეთ მეტი დეტალი, რაც ვერ აღბეჭდეთ ორსაათიან ფილმში – კეისი [ბლოისი, HBO Max-ის ხელმძღვანელი] არ მოსწონს, როდესაც ამას ვამბობ, მაგრამ მაინც ვიტყვი. ნამდვილად ვფიქრობ, რომ ეს ათწლეულის სტრიმინგ მოვლენა იქნება.“ ფილმები უკიდურესად წარმატებული იყო და ხშირად მოიხსენიება, როგორც ერთ-ერთი ყველაზე მაღალშემოსავლიანი კინოფრენჩაიზი ისტორიაში, რითაც ჯადოქრული სამყარო პოპ კულტურაში განამტკიცა. ფრენჩაიზმა მსოფლიო მასშტაბით 9.5 მილიარდ დოლარზე მეტი შემოსავალი მოიტანა, „ჰარი პოტერი და სიკვდილის საჩუქრები — ნაწილი 2“-ის შემოსავალი 1.3 მილიარდ დოლარს გადააჭარბა. ეს სამყარო კვლავაც არის მთავარი ტურისტული ღირსშესანიშნაობა და შემოსავალსაც იღებს, მიუხედავად იმისა, რომ 15 წლის წინ დასრულდა. ახალ მსახიობთა შემადგენლობაში შედიან: ჯონ ლითგოუ ალბუს დამბლდორის როლში, ჯონი ფლინი ლუციუს მალფოის როლში, ჯენეტ მაკტირი მინერვა მაკგონაგალის როლში, კეტრინ პარკინსონი მოლი უიზლის როლში, უორვიკ დევისი პროფესორ ფილიუს ფლიტვიკის როლში, ნიკ ფროსტი რუბეუს ჰაგრიდის როლში, ბელ პაული პეტუნია დარსლის როლში, ლუიზ ბრეილი მადამ როლანდა ჰუჩის როლში და პააპა ესიედუ სევერუს სნეიპის როლში. HBO-ს თავმჯდომარემ და აღმასრულებელმა დირექტორმა, ბლოისმა დაადასტურა, რომ „ჰარი პოტერის“ სერიალი 2027 წელს გამოვა, თუმცა კონკრეტული თარიღი ჯერ არ გამოცხადებულა.