მსახიობი რობერტ ქერადაინი, რომელიც ცნობილი სამსახიობო ოჯახის წარმომადგენელი იყო, 71 წლის ასაკში გარდაიცვალა. გამოცემა Deadline-ის ინფორმაციით, ქერადაინმა სიცოცხლე სუიციდით დაასრულა, მას შემდეგ, რაც ორი ათწლეულის განმავლობაში ბიპოლარულ აშლილობას ებრძოდა. ქერადაინი მაყურებლისთვის ყველაზე მეტად ცნობილია ლუის სკოლნიკის როლით ფრენჩაიზიდან „ნერდების შურისძიება“, ასევე ლიზის მამის, სემ მაკგუაირის როლით სერიალში „ლიზი მაკგუაირი“, სადაც მთავარ როლს ჰილარი დაფი ასრულებდა. რობერტ ქერადაინი მსახიობ ჯონ ქერადაინის ვაჟი იყო, რომელიც 1988 წელს გარდაიცვალა. ის მსახიობ ქით ქერადაინის ძმა და მსახიობ დევიდ ქერადაინის ნახევარძმა იყო, რომელიც 2009 წელს გარდაიცვალა. ქერადაინების ოჯახმა რობერტის გარდაცვალებასთან დაკავშირებით შემდეგი განცხადება გაავრცელა: „უდიდესი სევდით გიზიარებთ, რომ გარდაიცვალა ჩვენი საყვარელი მამა, ბაბუა, ბიძა და ძმა რობერტ ქერადაინი. სამყაროში, რომელიც ასე ბნელი შეიძლება მოგვეჩვენოს, ბობი ყოველთვის სინათლის შუქურა იყო გარშემომყოფთათვის. ჩვენ შეძრულნი ვართ ამ მშვენიერი სულის დაკარგვით და გვსურს, ვაღიაროთ ბობის გმირული ბრძოლა ბიპოლარული აშლილობის წინააღმდეგ, რომელსაც ის თითქმის ორი ათწლეულის განმავლობაში ებრძოდა. ვიმედოვნებთ, რომ მისი ცხოვრების გზა შუქს მოჰფენს და ხელს შეუწყობს იმ სტიგმის დაძლევას, რომელიც ფსიქიკურ დაავადებას თან ახლავს. ამჟამად ვითხოვთ კონფიდენციალურობას, რათა ვიგლოვოთ ეს გაუგებარი დანაკარგი. მადლიერებით თქვენი გაგებისა და თანაგრძნობისთვის.“ 1954 წელს მსახიობისა და მხატვრის, სონია სორელისა და მსახიობ ჯონ ქერადაინის ოჯახში დაბადებულმა რობერტ ქერადაინმა სამსახიობო კარიერა 1970-იან წლებში დაიწყო, მონაწილეობდა ისეთ სატელევიზიო შოუებში, როგორიცაა „ბონანცა“ და „კუნგ ფუ“, რომელშიც მისი ძმა დევიდ ქერადაინი მონაწილეობდა. მისი კინოდებიუტი შედგა 1972 წლის ჯონ უეინის ვესტერნში „კოვბოები“, ასევე მცირე როლი ჰქონდა მარტინ სკორსეზეს ფილმში „ბოროტი ქუჩები“ (რომელიც სკორსეზეს პირადი ფავორიტია საკუთარი კარიერიდან). ქერადაინი აგრძელებდა მცირე მეორეხარისხოვანი როლების შესრულებას, თუმცა უფრო დიდ წარმატებას მიაღწია 1984 წლის კომედიაში „ნერდების შურისძიება“ ლუის სკოლნიკის როლის შესრულების შემდეგ. ორიგინალურ ფილმს კიდევ სამი „ნერდების“ გაგრძელება მოჰყვა და ქერადაინი ლუისის როლში მათ ყველაში გამოჩნდა. მოგვიანებით, 2001 წლიდან 2004 წლამდე, ქერადაინი ლიზი მაკგუაირის მამის, სემ მაკგუაირის როლს ასრულებდა ჰილარი დაფის ჰიტ სიტკომში „ლიზი მაკგუაირი“. მან ეს როლი 2003 წელს ფილმში „ლიზი მაკგუაირი“ კვლავ განასახიერა. პირად ცხოვრებაში ქერადაინი ბიპოლარულ აშლილობას ებრძოდა. ქერადაინის გარდაცვალების შემდეგ გავრცელებულ განცხადებაში, მისმა ძმამ ქით ქერადაინმა ფსიქიკური ჯანმრთელობის მდგომარეობის შესახებ განაცხადა: „ჩვენ გვინდა, რომ ადამიანებმა იცოდნენ ამის შესახებ და ამაში სირცხვილი არაფერია. ეს არის დაავადება, რომელმაც ის დაიმორჩილა, და მე მსურს, ვადიდო მისი ბრძოლა მასთან და აღვნიშნო მისი მშვენიერი სული. ის უზომოდ ნიჭიერი იყო და ყოველდღე მოგვაკლდება. ჩვენ ნუგეშს ვიპოვით იმაში, თუ რამდენად მხიარული, ბრძენი, სრულად მიმღები და ტოლერანტული იყო ის. ასეთი იყო ჩემი უმცროსი ძმა.“