ჯეინ ოსტინის კლასიკური რომანის „სიამაყე და ცრურწმენის“ უახლესი ადაპტაცია გამოქვეყნდა და შესაძლოა, Netflix-მა „ქარიშხლიანი უღელტეხილის“ საპასუხო პროექტი იპოვა. ჯეინ ოსტინის კლასიკურ რომანს უკვე აქვს მრავალი კინო და სატელევიზიო ადაპტაცია, მაგრამ სტრიმინგ პლატფორმა დარწმუნებულია, რომ მან იპოვა სრულყოფილი გზა, რათა უკვდავი სასიყვარულო ისტორია ახალ თაობას წარუდგინოს აღიარებული მსახიობების მონაწილეობით. Netflix-მა „სიამაყე და ცრურწმენის“ პირველი თიზერ ტრეილერი გაავრცელა, რომელშიც ელიზაბეტ ბენეტის როლს ემა კორინი („გვირგვინი“) ასრულებს, მისტერ დარსის როლს კი – ჯეკ ლოუდენი („ნელი ცხენები“). კადრები ექვსეპიზოდიანი სერიალის მოკლე ფრაგმენტებს აჩვენებს, რომელიც განწირული შეყვარებულების მონატრებით სავსე მზერით სრულდება. ტრეილერში მეტი დეტალი არ ჩანს, თუმცა ცნობილია, რომ Netflix-ის პროექტში გამოჩნდებიან ყველა ის პერსონაჟი, რომელიც ორიგინალური მოთხრობის მოყვარულებს უყვართ და იცნობენ. ჯერ ნაადრევია იმის თქმა, თუ როგორ შეედრება ის წინა ადაპტაციებს, მაგრამ „სიამაყე და ცრურწმენა“ უკვე ღირსეულ ნამუშევრად გამოიყურება. კორინისა (ელიზაბეტ ბენეტი) და ლოუდენის (მისტერ დარსი) გარდა, Netflix-ის „სიამაყე და ცრურწმენაში“ მონაწილეობენ: ოლივია კოლმანი (მისის ბენეტი), რუფუს სიუელი (მისტერ ბენეტი), ფრეია მეივორი (ჯეინ ბენეტი), რეა ნორვუდი (ლიდია ბენეტი), ჰოუპი პარიში (კიტის ბენეტი), ჯეიმი დემეტრიუ (მისტერ კოლინზი), დერილ მაკკორმაკი (მისტერ ბინგლი), ლუის პარტრიჯი (მისტერ უიკჰემი), სიენა კელი (კეროლაინ ბინგლი), ფიონა შოუ (ლედი კეტრინ დე ბურგი), ანჯანა ვასანი (მისის გარდინერი), სებასტიან არმესტო (მისტერ გარდინერი), როუზი კავალიერო (ლედი ლუკასი), საფრონ ქუმბერი (მისის ჰერსტი), ჯეიმს დრაიდენი (მისტერ ჰერსტი), ჯასტინ ედვარდსი (სერ უილიამ ლუკასი), ჯეიმს ნორტკოტი (პოლკოვნიკი ფორსტერი), ელოიზ ვები (ჰარიეტ ფორსტერი) და იზაბელა სერმონი (ჯორჯიანა დარსი). „სიამაყე და ცრურწმენის“ სცენარისტი დოლი ოლდერტონი, რეჟისორი კი ევროს ლინია. სერიალს არ აქვს ოფიციალური პრემიერის თარიღი Netflix-ზე, მაგრამ დადასტურებულია, რომ ის 2026 წელს გამოვა. მიუხედავად იმისა, რომ „სიამაყე და ცრურწმენის“ მრავალი ვერსია არსებობს, Netflix ხაზს უსვამს, რომ მისი ექვსეპიზოდიანი სერიალი მაყურებლის ახალი თაობისთვისაა განკუთვნილი. ოლდერტონმა წყარო მასალას „რომანტიკული კომედიის საფუძველი“ უწოდა და აღნიშნა, რომ მისი მომავალი ვერსია დრამისა და კომედიის ნაზავი იქნება. „ჯეინ ოსტინის „სიამაყე და ცრურწმენა“ რომანტიკული კომედიის ეტალონია – დიდი სიამოვნება იყო მისი ფურცლების ხელახლა გადაფურცვლა, რათა ამ საყვარელი წიგნის გასაცოცხლებლად როგორც ნაცნობი, ისე ახალი გზები მეპოვა. წიგნი ადაპტაციისთვის საჩუქარია – ის სავსეა დრამით, სიღრმით, კომედიითა და ხიბლით. მასში დევს შესაძლებლობა, შევისწავლოთ სიყვარულის, ოჯახის, მეგობრობისა და საზოგადოების სირთულეები, ამასთან, შევინარჩუნოთ ოსტინის სასიამოვნოდ დაკვირვებული სტილი. ევროს ლინის რეჟისორობითა და ჩვენი ვარსკვლავური გუნდით, მოუთმენლად ველი ამ მხიარული და რთული პერსონაჟების ხელახლა წარდგენას მათთვის, ვისთვისაც „სიამაყე და ცრურწმენა“ საყვარელი წიგნია, ასევე მათთვის, ვინც ჯერ არ შეხვედრია მათ ლიზისა და მისტერ დარსის“, – განაცხადა ოლდერტონმა.