მსახიობი შაია ლაბაფი ნიუ ორლეანში, სამშაბათს დილით დააკავეს მას შემდეგ, რაც ქალაქის მარდი გრასის ზეიმისას ბარში ორ ადამიანს, სავარაუდოდ, ფიზიკური შეურაცხყოფა მიაყენა. „როლინგ სტოუნისთვის“ გავრცელებული ნიუ ორლეანის პოლიციის დეპარტამენტის განცხადების თანახმად, ლაბაფს მსუბუქი ფიზიკური შეურაცხყოფის ორ ეპიზოდზე წაუყენეს ბრალი. ის დღეს მოგვიანებით სასამართლოს წინაშე უნდა წარდგეს. მსახიობის წარმომადგენელმა კომენტარის მოთხოვნაზე დაუყოვნებლივ არ უპასუხა. პოლიციის ინფორმაციით, ჩხუბი მას შემდეგ დაიწყო, რაც ლაბაფი „არეულობის გამოწვევაში“ და ფრანგული კვარტლის ერთ-ერთ ბარში სულ უფრო „აგრესიულ ქცევაში“ დაადანაშაულეს. თანამშრომელმა სცადა ლაბაფის „გაყვანა“, და როგორც კი მსახიობი გაიყვანეს, ერთ-ერთმა დაზარალებულმა განაცხადა, რომ ლაბაფმა მას „რამდენჯერმე დაარტყა მუშტებით“. ლაბაფი, სავარაუდოდ, წავიდა, მაგრამ შემდეგ დაბრუნდა „კიდევ უფრო აგრესიული ქცევით“. ნიუ ორლეანის პოლიციის დეპარტამენტის განცხადებაში ნათქვამია: „რამდენიმე ადამიანი ცდილობდა [ლაბაფის] შეკავებას – საბოლოოდ ის გაუშვეს იმ იმედით, რომ წავიდოდა – მაგრამ მან, სავარაუდოდ, კვლავ დაარტყა იმავე დაზარალებულს მუშტებით სხეულის ზედა ნაწილში. შემდეგ ლაბაფმა, სავარაუდოდ, თავს დაესხა სხვა ადამიანს – ცხვირში დაარტყა. ლაბაფი კვლავ შეკავებული იყო, სანამ პოლიცია არ მივიდა.“ პოლიციამ ლაბაფი თავდაპირველად საავადმყოფოში გადაიყვანა, სადაც მას უცნობი დაზიანებების გამო მკურნალობა ჩაუტარდა. ის საავადმყოფოდან გაწერისთანავე დააკავეს და ბრალი წაუყენეს. სხვადასხვა ცნობით, ბოლო დღეებში ლაბაფი ნიუ ორლეანში, მარდი გრასის ზეიმისას არაერთხელ შენიშნეს. მისი ქცევა, გავრცელებული ინფორმაციით, უწყინარი ნასვამობიდან სულ უფრო არაპროგნოზირებად ქცევამდე მერყეობდა. „ჰოლივუდ რეპორტერის“ ცნობით, ის ერთ-ერთ ბარში მაისურის გარეშე მივიდა (თუმცა მოთხოვნისთანავე ჩაიცვა). მეორე დაწესებულებამ, სავარაუდოდ, ლაბაფს კვირას დატოვება სთხოვა მას შემდეგ, რაც მან „ცნობილი ბარმენის“ როლის მორგება სცადა. ლაბაფს აქვს ალკოჰოლიზმის ისტორია და არაერთხელ წაუყენეს ბრალი ძალადობრივ ქცევასა და ოჯახში ძალადობაში. როდესაც მისმა ყოფილმა პარტნიორმა, FKA Twigs-მა, ლაბაფი ემოციურ და ფიზიკურ ძალადობაში დაადანაშაულა, მსახიობმა განცხადება გაავრცელა და თქვა: „არ მაქვს საბაბი ჩემი ალკოჰოლიზმისა თუ აგრესიისთვის, მხოლოდ რაციონალიზაცია. წლების განმავლობაში მე ვძალადობდი საკუთარ თავზე და ყველასზე, ვინც ჩემს გარშემო იყო.“ (მოგვიანებით ლაბაფმა უარყო FKA Twigs-ის ბრალდებები და გასულ ზაფხულს მხარეებმა სექსუალური ძალადობისა და თავდასხმის სარჩელი მორიგებით დაასრულეს.) გასულ წელს ლაბაფი ასევე იყო ლუის ო’ნილის დოკუმენტური ფილმის, „Slauson Rec“-ის საგანი, რომელიც ეხებოდა ექსპერიმენტულ თეატრალურ დასს, მსახიობმა რომ დააარსა და ხელმძღვანელობდა 2018 წელს. ფილმში ნაჩვენებია ლაბაფის მრავალი სცენა, სადაც ის სიტყვიერად შეურაცხყოფს თავის სტუდენტებს და ზოგჯერ მათ მიმართ ფიზიკურადაც ძალადობს.