„სოპრანოს“ ვარსკვლავი მაიკლ იმპერიოლი: შოუს გმირები დღეს ტრამპს დაუჭერდნენ მხარს

სერიალ „სოპრანოს“ ვარსკვლავმა მაიკლ იმპერიოლიმ The Independent-თან ინტერვიუში განაცხადა, რომ HBO-ს კრიმინალური დრამის პერსონაჟები, სავარაუდოდ, დონალდ ტრამპის მხარდამჭერები იქნებოდნენ, თუ შოუ დღეს გადაიღებოდა. „შოუ ამერიკულ ოცნებას ეხება, განსაკუთრებით კი იმიგრანტების თვალით დანახულს“, – თქვა იმპერიოლიმ. „ვფიქრობ, ეს იქნებოდა ერთ-ერთი მთავარი თემა, თუ ის დღეს გაკეთდებოდა: მიმდინარე კლიმატი აშშ-ში და რას უშვრებიან იმიგრანტებს. ფაქტია, რომ ეს პერსონაჟები ყველა იმიგრანტები არიან, მაგრამ ვფიქრობ, ბევრი მათგანი, უცნაურია, მაგრამ ალბათ, ტრამპის მომხრე იქნებოდა. როგორ შეათანხმებდნენ ისინი ამ ყველაფერს? როდესაც იტალიელები ჩამოვიდნენ [აშშ-ში] – და ხალხს ეს ავიწყდება, ან არ სურს მისი დანახვა – ბევრი მათგანი არალეგალი იყო.“ იმპერიოლიმ კრისტოფერ მოლტისანტის როლი შეასრულა „სოპრანოს“ 86-ვე ეპიზოდში, რომელიც HBO-ზე 1999-2007 წლებში, ექვსი სეზონის განმავლობაში გადიოდა. იგი ფართოდ მიიჩნევა ყველა დროის ერთ-ერთ საუკეთესო სატელევიზიო დრამად და შოუმ ეთერში გასვლისას 21 ემის ჯილდო მოიპოვა, მათ შორის სამი საუკეთესო მსახიობი მამაკაცის ჯილდო გარდაცვლილი ჯეიმს განდოლფინისთვის. იმპერიოლი ემისზე ოთხჯერ იყო ნომინირებული და ერთხელ გაიმარჯვა დრამაში საუკეთესო მეორეხარისხოვანი მსახიობი მამაკაცის კატეგორიაში. „სოპრანოს“ შემქმნელმა დევიდ ჩეისმა New York Times-ს 2019 წელს განუცხადა, რომ მისი აზრით, განდოლფინის ტონი სოპრანოს ტრამპი არ მოხიბლავდა. „ის იფიქრებდა, რომ ეს კაცი [უცენზუროდ] იყო სავსე“, – თქვა მან. „მიუხედავად იმისა, ფიქრობდა თუ არა ტონი, რომ ის კარგი პრეზიდენტი იყო, – არ მგონია, ტონი ამ კითხვაზე საერთოდ ბევრს ფიქრობდა, ვინც არ უნდა ყოფილიყო თანამდებობაზე. მაგრამ ვიცი, რომ ტონი ტრამპს წვრილფეხობად ჩათვლიდა, მისი სიცრუისა და პრეზენტაციის გათვალისწინებით.“