კრიმინალური დრამა „ველური“ (Untamed) მეორე სეზონს ჰავაიზე გადაიღებს. ერიკ ბანა კვლავ დაუბრუნდება სპეციალური აგენტის, კაილ ტერნერის როლს, რათა გამოიძიოს მორიგი დანაშაული. შემოქმედების თქმით, მეორე სეზონის მოქმედება პირველი სეზონის მოვლენებიდან წელიწადნახევრის შემდეგ ვითარდება. ჰავაიზე გამგზავრებამდე ტერნერს სხვა ეროვნულ პარკებში რამდენიმე გამოძიება ჰქონდა ჩატარებული. Netflix-მა მეორე სეზონის შესახებ შემდეგი განაცხადა: „მეორე სეზონში, Netflix-ის ჰიტ-სერიალი „ველური“ მიჰყვება სპეციალურ აგენტ კაილ ტერნერს, რომელსაც ჰავაის ვულკანების ეროვნულ პარკში იდუმალი სიკვდილის გამოსაძიებლად იძახებენ. იქ ადგილობრივი დაძაბულობა და ცვალებადი, ცოცხალი ლანდშაფტი არაპროგნოზირებად ძალად იქცევა.“ თანაშემოქმედებმა მარკ ლ. სმიტმა და ელ სმიტმა Tudum-თან მეორე სეზონის შესახებ განაცხადეს: „მოხარულები ვართ, რომ გამოვიკვლევთ სრულიად განსხვავებული ეროვნული პარკის ხელუხლებელ პეიზაჟებს და კულტურულ იდენტობას, ასევე ვიპოვით ტერნერს ახალ მენტალურ მდგომარეობაში, იოსემიტის კომფორტის ზონის მიღმა.“ ექვსეპიზოდიანი სეზონის გადაღებები ამჟამად ჰავაიზე მიმდინარეობს.